Haukar - Keflavík á föstudag kl. 19:15

Eftir stutt EM-hlé fer Inkasso-deildin aftur af stað og okkar menn mæta Haukum á útivelli á föstudaginn.  Leikurinn er í 7. umferð deildarinnar og verður á Ásvöllum í Hafnarfirði kl. 19:15.  Fyrir þennan leik er Keflavík í 4. sæti deildarinnar með 10 stig og er enn eina taplausa liðið í deildinni.  Haukar eru  í 8. sæti með sjö stig.  Dómari leiksins er Einar Ingi Jóhannsson, aðstoðardómarar eru Viatcheslav Titov og Ásbjörn Sigþór Snorrason og Einar Örn Daníelsson er svo eftirlitsmaður KSÍ.  Við minnum á að leikurinn verður sýndur beint á Stöð 2 Sport.

Keflavík og Haukar léku síðast deildarleik árið 2010 þegar bæði lið voru í efstu deild.  Fyrri leiknum lauk með 1-1 jafntefli en hann fór reyndar fram á Njarðvíkurvelli en þá stóðu yfir endurbætur á heimavelli okkar.  Haukar unnu seinni leikinn 2-0 en sá leikur fór fram á Hlíðarenda þar sem Haukar léku heimaleiki sína þetta sumar.  Liðin mættust einnig í bikarkeppninni árið 2011 og þá vann Keflavík 3-1 sigur á Ásvöllum í 16 liða úrslitum keppninar. 

Keflavík og Haukar hafa áður leikið sex leiki í B-deildinni árin 1981, 1991 og 2003.  Keflavík hefur unnið alla leikina og markatalan er 24-2 í þessum leikjum.  Liðin hafa einnig leikið fjóra leiki í efstu deild 1979 og 2010 og þar hefur hvort lið unnið einn leik og tveimur lokið með jafntefli.  Markatalan þar er 5-4 fyrir Keflavík.  Þessi lið hafa svo mæst þrisvar sinnum í bikarkeppninni, árin 1990, 1992 og 2011.  Þar hefur Keflavík alltaf farið með sigur af hólmi og markatalan er 10-1, okkur í vil.