Elís Kristjánsson látinn

Að morgni laugardagsins 3. september bárust þær sorglegu fréttir að einn af okkar dáðustu þjálfurum væri látinn. Elís Kristjánsson, eða Elli eins og hann var kallaður í daglegu tali háði hetjulega baráttu við krabbamein og þeirri baráttu lauk aðfaranótt laugardagsins.

Elli starfaði við þjálfun hjá Knattspyrnudeild Keflavíkur og þá aðallega í yngri flokkum. Hann hóf þjálfun seint á sínu æviskeiði en gerði það af miklum áhuga og eldmóð. Það var greinilegt að þjálfunin gaf honum mikið og á sama tíma gaf hann mikið af sér til allra iðkenda. 

Síðustu mánuði varð hann að taka sér frí frá þjálfun vegna veikindanna en engu að síður var hann tíður gestur á æfingar barnanna og þau tóku honum ávallt svo vel. Hann mætti á alla leiki sem hann gat og var með sterkar skoðanir á öllum hliðum fótboltans hér í Keflavík hvort sem það var í yngri flokkum, kvenna- eða karlafótboltanum.

Elli var gæðablóð, einstakur maður sem stundaði sína vinnu fyrir fótboltann af alúð og dugnaði. Hann setti svo sannarlega svip sinn á okkar starf og hans verður sárt saknað af okkur öllum.

Knattspyrnudeild Keflavíkur sendir fjölskyldu, vinum og aðstandendum Ella innilegar samúðarkveðjur.

Minning um góðan mann lifir.